• ఎమ్మెల్యే బుయ్యని మనోహర్ రెడ్డి
• తాండూరు నియోజకవర్గంలో 261 మందికి రూ. 1.50 కోట్ల విలువైన చెక్కులు పంపిణీ

జనవాహిని ప్రతినిధి తాండూరు; ముఖ్యమంత్రి సహాయ నిధి కేవలం ఆర్థిక సహాయం మాత్రమే కాదని, తీవ్ర అనారోగ్యంతో కష్టాల్లో ఉన్న ప్రతి కుటుంబానికి ప్రభుత్వం అందించే కొండంత భరోసా అని తాండూరు ఎమ్మెల్యే బుయ్యని మనోహర్ రెడ్డి స్పష్టం చేశారు.
వివిధ రకాల తీవ్ర అనారోగ్య సమస్యలతో బాధపడుతూ ఆసుపత్రుల్లో చికిత్స పొందిన తాండూరు నియోజకవర్గ పరిధిలోని అన్ని మండలాలకు చెందిన 261 మంది లబ్ధిదారులకు ప్రభుత్వం నుంచి మంజూరైన రూ. 1,50,00,000/- కోటి యాభై లక్షల రూపాయలు విలువగల సీఎంఆర్‌ఎఫ్ చెక్కులను స్థానిక కాంగ్రెస్ పార్టీ కార్యాలయంలో పార్టీ నాయకులతో కలిసి ఆయన పంపిణీ చేశారు.
ఈ సందర్భంగా ఎమ్మెల్యే మాట్లాడుతూ… నిరుపేదల ఆరోగ్య భద్రతకు ప్రభుత్వం అత్యంత ప్రాధాన్యతనిస్తుందని తెలిపారు. ఆపద సమయంలో సీఎంఆర్‌ఎఫ్ నిధులు బాధితులకు ఎంతో ఉపశమనాన్ని ఇస్తున్నాయని, అర్హులైన ప్రతి ఒక్కరికీ ఈ పథకం ద్వారా సహాయం అందేలా నిరంతరం కృషి చేస్తామని హామీ ఇచ్చారు.
ఈ కార్యక్రమంలో స్థానిక ప్రజాప్రతినిధులు, కాంగ్రెస్ పార్టీ నాయకులు, కార్యకర్తలు మరియు లబ్ధిదారులు పాల్గొన్నారు.

• వార్డులోని 4 ప్రాంతాలకు కొత్త పేర్లు ఖరారు
• మున్సిపల్ కౌన్సిల్‌లో ప్రతిపాదిత తీర్మానం ఆమోదం

జనవాహిని ప్రతినిధి తాండూరు;ఎన్నికల సమయంలో ఇచ్చిన హామీని తాండూర్ మున్సిపల్ వార్డు నెంబర్ 7 కౌన్సిలర్ షేక్ ఇర్షాద్ నెరవేర్చారు. తన పరిధిలోని నాలుగు ప్రధాన ప్రాంతాలకు ప్రత్యేక పేర్లు నామకరణం చేస్తానన్న మాట మేరకు, బుధవారం నిర్వహించిన మున్సిపల్ కౌన్సిల్ సమావేశంలో అధికారికంగా తీర్మానం ప్రవేశపెట్టి ఆమోదింపజేశారు.
హుస్సేన్ నగర్, కోకిల కాటేజ్,సుప్రీం కాలనీ, విలేమూన్ చౌరస్తా గా నామకరణం చేశారు.
వార్డులోని సమస్యలు, అవసరాలను గుర్తించి ఇచ్చిన హామీని అధికారిక తీర్మానం ద్వారా అమలు దిశగా ముందుకు తీసుకెళ్లడం పట్ల వార్డు నెంబర్ 7 ప్రజలు హర్షం వ్యక్తం చేశారు.
ఈ సందర్భంగా కౌన్సిలర్ ఇర్షాద్ మాట్లాడుతూ… “ప్రజలకు ఇచ్చిన మాటే నాకు అత్యంత ముఖ్యంమన్నారు. ఎన్నికల సమయంలో హామీ ఇచ్చిన ప్రతి అంశాన్ని దశలవారీగా నెరవేర్చి, వార్డును మోడల్ వార్డుగా తీర్చిదిద్దడమే లక్ష్యం అని తెలిపారు.

• మాజీ ఎమ్మెల్యే పైలెట్‌ రోహిత్‌రెడ్డి
• కాంగ్రెస్ హామీలపై అగ్రహం 
• బాకీలాన్ని వసూళ్లు చేస్తాం అంటూ భారీ నిరసన

జనవాహిని ప్రతినిధి తాండూరు ; ఎన్నికల్లో ఇచ్చిన హామీలను గాలికొదిలేసి కాంగ్రెస్ ప్రభుత్వం ప్రజలను దారుణంగా మోసం చేసిందని, ప్రజలకు రావాల్సిన ప్రతి బాకీని వసూలు చేసే వరకు పోరాటం ఆగదని తాండూర్ మాజీ ఎమ్మెల్యే పైలెట్ రోహిత్‌రెడ్డి స్పష్టం చేశారు. బీఆర్‌ఎస్ వర్కింగ్ ప్రెసిడెంట్ కేటీఆర్ పిలుపు మేరకు బుధవారం తాండూరులో నిర్వహించిన నిరసన ప్రదర్శన హోరెత్తింది.
బీఆర్‌ఎస్ క్యాంప్ కార్యాలయంలో ప్రభుత్వం వైఫల్యాలపై “తాండూర్ చార్జ్‌షీట్”, “బాకీ కార్డు”లను ఆవిష్కరించిన అనంతరం, 420 హామీల ఫ్లెక్సీతో ఇందిరా చౌక్ వరకు భారీ ర్యాలీ నిర్వహించారు.
ఈ సందర్భంగా రోహిత్‌రెడ్డి మాట్లాడుతూ.. మహాలక్ష్మి పథకం కింద ప్రతి మహిళకు రూ.82,500, పెన్షన్ల రూపంలో రూ.66,000, రైతు భరోసా ఇవ్వక నాలుగు ఎకరాలున్న రైతుకు రూ.1.02 లక్షల చొప్పున కాంగ్రెస్ ప్రభుత్వం బాకీ పడిందని మండిపడ్డారు. స్కూటీలు, తులం బంగారం, విద్యాభరోసా హామీలన్నీ అటకెక్కాయని విమర్శించారు. కాంగ్రెస్ నాయకులను ఎక్కడికక్కడ నిలదీయాలని, అక్రమ కేసులకు భయపడకుండా కేసీఆర్ నాయకత్వంలో ప్రజల హక్కుల కోసం పోరాడుతామని స్పష్టం చేశారు.