• ఎమ్మెల్యే బుయ్యని మనోహర్ రెడ్డిపై బిఆర్ఎస్ ఆరోపణలు నిరాధారం
• దేవాలయ అభివృద్ధిని అడ్డుకోవద్దు: ఎస్. ప్రసాద్ గౌడ్

జనవాహిని ప్రతినిధి తాండూరు; స్థానిక శాసనసభ్యులు బుయ్యని మనోహర్ రెడ్డితో పాటు శ్రీ పోట్లీ మారాజ్ దేవాలయంపై బిఆర్ఎస్ నాయకులు చేస్తున్న అవాస్తవ, నిరాధారమైన ఆరోపణలను వెంటనే మానుకోవాలని ఆలయ కార్యవర్గ సభ్యులు ఎస్. ప్రసాద్ గౌడ్ హెచ్చరించారు. ఈ సందర్బంగా అయన ఓ ప్రకటనలో మాట్లాడుతూ …
ప్రజాసేవే లక్ష్యంగా ముందుకు సాగుతున్న ఎమ్మెల్యేపై అసత్య ప్రచారాలు చేస్తూ ప్రజల్లో గందరగోళం సృష్టించడం సరికాదని హితవు పలికారు. నిన్న బిఆర్ఎస్ నాయకుడు రాజు గౌడ్ మరికొందరు చేసిన వ్యాఖ్యలను వారు తీవ్రంగా ఖండించారు. శ్రీ పోట్లీ మారాజ్ దేవాలయం దేవాదాయ శాఖ పరిధిలోని అత్యంత పవిత్రమైన స్థలమని తెలిపారు. ఆలయాన్ని కూల్చివేస్తున్నారని, స్థలాలను కబ్జా చేస్తున్నారని బిఆర్ఎస్ నాయకులు తీవ్రమైన ఆరోపణలు చేస్తున్నారని, ధైర్యముంటే దానికి సంబంధించిన ఆధారాలను ప్రజల ముందుంచాలని సవాలు విసిరారు. రాజకీయ ప్రయోజనాల కోసం పవిత్రమైన దేవాలయాన్ని వివాదాల్లోకి లాగడం తగదన్నారు.
దేవాలయ స్థలంలో నిబంధనల ప్రకారమే అభివృద్ధి కార్యక్రమాలు చేపట్టి, ఆలయానికి ఆదాయం సమకూర్చడం ద్వారా భక్తులకు మెరుగైన సౌకర్యాలు కల్పించడమే తమ లక్ష్యమని స్పష్టం చేశారు. ఎమ్మెల్యే మనోహర్ రెడ్డి సూచనల మేరకు చట్టానికి, ధర్మానికి లోబడే పనిచేస్తున్నామని తెలిపారు. దేవాలయ పవిత్రతను కాపాడటానికి, ఆలయాభివృద్ధికి రాజకీయాలకు అతీతంగా ప్రతి ఒక్కరూ సహకరించాలని, ఆధారాలు లేని ఆరోపణలకు స్వస్తి పలకాలని ప్రసాద్ గౌడ్ డిమాండ్ చేశారు.

• బుయ్యని సోదరుల సేవా కార్యక్రమాలపై విమర్శలు సరికావు
• తాండూర్ యువ నేత వికాస్ జోషి

జనవాహిని ప్రతినిధి తాండూరు; మాజీ ఎమ్మెల్యే పైలట్ రోహిత్ రెడ్డి సస్పెన్షన్ వ్యవహారంపై స్పష్టత ఇవ్వలేని వారు.. నిరంతరం ప్రజా సేవలో ఉన్న బుయ్యని సోదరులపై నిరాధార ఆరోపణలు చేయడం సరికాదని తాండూర్ నియోజకవర్గ యువ నేత వికాస్ జోషి మండిపడ్డారు. ఈ సందర్బంగా అయన ఓ ప్రకటనలో మాట్లాడుతూ … ఇతరులపై విమర్శలు చేసే ముందు తమ రాజకీయ నిర్ణయాలు, వ్యవహారాలపై ప్రజలకు సమాధానం చెప్పాలని డిమాండ్ చేశారు.
తాండూర్ ప్రాంతంలో గుడులు, బడులు అభివృద్ధి చెందుతుంటే ఓర్వలేక కొందరు దుష్ప్రచారం చేస్తున్నారని ఆయన ఆరోపించారు. ప్రభుత్వ భూముల కబ్జాపై మాట్లాడేవారు ఆధారాలతో సహా నిరూపించాలని సవాల్ విసిరారు.
బుయ్యని శ్రీనివాస్ రెడ్డి షాడో ఎమ్మెల్యే కాదని, నిత్యం ప్రజల మధ్య ఉంటూ కష్టసుఖాలు పంచుకునే ప్రజా సేవకుడని స్పష్టం చేశారు. 2020లో కరోనా కష్టకాలంలో నియోజకవర్గంలోని ప్రతి గ్రామానికి ఉచితంగా శానిటైజర్లు పంపిణీ చేసి ప్రజలకు అండగా నిలిచారని గుర్తుచేశారు. కుల, మత, వర్గ, వయోభేదాలకు అతీతంగా ఆపదలో ఉన్నవారికి ఆపన్నహస్తం అందించడం బుయ్యని సోదరుల నైజమని కొనియాడారు.
బుయ్యని సోదరులు అందిస్తున్న సేవలను చౌకబారు విమర్శలతో తగ్గించలేరని, ఎవరు ఎలాంటి వారో ప్రజలందరూ గమనిస్తున్నారని వికాస్ జోషి హెచ్చరించారు.

• తాండూరులో అలరించిన కృష్ణాష్టమి సంబరాలు
• సాయి మేధ, ఆపిల్ కిడ్స్ స్కూళ్లలో ఉట్టికొట్టే వేడుకలు

జనవాహిని ప్రతినిధి తాండూరు; తాండూరు పట్టణంలోని శ్రీ సాయి మేధ విద్యాలయం, ఆపిల్ కిడ్స్ స్కూల్ ప్రాంగణంలో శుక్రవారం శ్రీ కృష్ణాష్టమి వేడుకలు కోలాహలంగా జరిగాయి. నల్లనయ్య, అల్లరి కృష్ణుడు, గోపికాలోలుడైన శ్రీకృష్ణుని జన్మదినాన్ని పురస్కరించుకుని చిన్నారులు వేసిన కృష్ణుడు, గోపికలు మరియు దశావతారాల వేషధారణలు ప్రత్యేక ఆకర్షణగా నిలిచాయి. విద్యార్థుల కోలాటం, సాంస్కృతిక ప్రదర్శనలు చూపర్లను ఎంతగానో ఆకట్టుకున్నాయి.
వేడుకల్లో భాగంగా నిర్వహించిన ఉట్టికొట్టే పోటీలలో బాలకృష్ణుడి రూపంలో ఉన్న చిన్నారులు పోటీపడి పైకి ఎగురుతూ పెరుగు ఉట్టిని పగలగొట్టడం ప్రతి ఒక్కరినీ అలరించింది.
ఈ సందర్భంగా పాఠశాల కరస్పాండెంట్ పెరుమాళ్ల వెంకట్ రెడ్డి మాట్లాడుతూ.. ఆంగ్ల మాధ్యమంలో చదువుతున్నప్పటికీ మన భారతీయ సంస్కృతీ సాంప్రదాయాలను మరువకూడదని పిలుపునిచ్చారు. చిన్ననాటి నుంచే పిల్లలకు భగవద్గీత శ్లోకాలు నేర్పించాల్సిన అవసరం ఉందన్నారు. తమ పాఠశాలల్లో కులమతాలకు అతీతంగా అన్ని పండుగలను పండుగ వాతావరణంలో నిర్వహిస్తామని తెలిపారు.
ఈ వేడుకలలో హిందూ ఉత్సవ సమితి ప్రతినిధులు, ఉపాధ్యాయులు, విద్యార్థులు మరియు వారి తల్లిదండ్రులు ఉత్సాహంగా పాల్గొన్నారు.

• ఆరు గ్యారంటీల పేరుతో మోసం చేసిన చరిత్ర కాంగ్రెస్‌ది
• కాంగ్రెస్ నాయకుల వ్యాఖ్యలకు బిఆర్ఎస్ కౌంటర్
• అబద్ధపు కేసులతో బిఆర్ఎస్‌ను ఆపలేరు
• రోహిత్ రెడ్డి నేతృత్వంలో తాండూరుపై మళ్లీ గులాబీ జెండా ఖాయం

జనవాహిని ప్రతినిధి తాండూరు; ఆరు గ్యారంటీల పేరుతో తెలంగాణ ప్రజలను తీవ్రంగా మోసం చేసి కాంగ్రెస్ పార్టీ అధికారంలోకి వచ్చిందని బిఆర్ఎస్ పార్టీ 34వ వార్డు కౌన్సిలర్ సుప్రీత కరుణాకర్ విమర్శలు చేశారు. గంజాయి, డ్రగ్స్ కేసులలో మాజీ ఎమ్మెల్యే జైలుకు వెళ్లారంటూ కాంగ్రెస్ నాయకులు చేసిన వ్యాఖ్యలు, ఆరోపణలను ఆమె ఖండించారు.
ఈ సందర్భంగా సుప్రీత కరుణాకర్ మాట్లాడుతూ, తెలంగాణ రాష్ట్రాన్ని సాధించి, ప్రజల సంక్షేమామే ధ్యేయంగా సుపరిపాలన అందించిన ఘన చరిత్ర బిఆర్ఎస్ పార్టీదని స్పష్టం చేశారు. చేతిలో అధికారం ఉందనే అహంకారంతో కాంగ్రెస్ నాయకులు తమ పార్టీ నాయకులపై, కార్యకర్తలపై ఎన్ని అబద్ధపు కేసులు, కుట్రపూరిత ఆరోపణలు చేసినా భయపడేది లేదని తేల్చి చెప్పారు. రాజకీయ కక్ష సాధింపు చర్యలతో బిఆర్ఎస్ మనోధైర్యాన్ని దెబ్బతీయలేరని మండిపడ్డారు.
రాబోయే ఎన్నికలు ఎప్పుడు వచ్చినా తాండూరు ప్రజలతో పాటు రాష్ట్ర ప్రజలంతా కాంగ్రెస్ పార్టీ మోసపూరిత వాగ్దానాలకు, వైఫల్యాలకు తగిన బుద్ధి చెప్పడానికి సిద్ధంగా ఉన్నారని పేర్కొన్నారు. తాండూరు నియోజకవర్గంలో మాజీ ఎమ్మెల్యే పైలట్ రోహిత్ రెడ్డి నాయకత్వంలో బిఆర్ఎస్ జెండా ఎగరడం ఖాయమని, కేసీఆర్ నాయకత్వంలో మళ్లీ బిఆర్ఎస్ ప్రభుత్వం రావడం తథ్యమని ఆమె ధీమా వ్యక్తం చేశారు. కాంగ్రెస్ నాయకులు విమర్శలు మానుకొని ప్రజా సమస్యల పరిష్కారంపై దృష్టి సారించాలని హితవు పలికారు.